२८ असोज २०८३, वुधवार
रामेछाप– रामेछापको सुनापति गाउँपालिकाले धार्मिक तथा सांस्कृतिक पर्यटन प्रवद्र्धन, कृषि उत्पादनको बजारीकरण, शिक्षा र स्वास्थ्य सेवाको सुधार तथा जोखिमयुक्त बस्ती स्थानान्तरणलाई प्राथमिकतामा राखेर विकासका कार्यक्रम अघि बढाएको छ । गाउँपालिका अध्यक्ष ठूलोकान्छा तामाङका अनुसार जनप्रतिनिधिका रूपमा कार्यभार सम्हाल्दा पाँच वर्षभित्र शिक्षा, स्वास्थ्य, सडक, पर्यटनलगायतका क्षेत्रमा सुधार गर्ने प्रतिबद्धता व्यक्त गरिएको थियो । सोही प्रतिबद्धताअनुसार काम गर्दै जाँदा घोषणापत्रमा उल्लेख गरिएका योजनाभन्दा बढी काम भएको उहाँको दाबी छ । अध्यक्ष तामाङले गाउँपालिकाको विकास निर्माणसँगै स्थानीय धार्मिक, सांस्कृतिक र प्राकृतिक सम्पदाको संरक्षण तथा प्रवद्र्धनलाई जोड दिइएको बताउनुभयो । उहाँका अनुसार सुनापतिलाई धार्मिक पर्यटनको गन्तव्यका रूपमा स्थापित गर्ने उद्देश्यले विभिन्न पूर्वाधार निर्माण र प्रचारप्रसारका कार्यक्रम अघि बढाइएको छ ।
सुनापति गाउँपालिकाको लहरेमाने क्षेत्रमा रहेका १०८ छोर्तेन धार्मिक तथा सांस्कृतिक पर्यटनको प्रमुख आकर्षणका रूपमा चर्चामा आएका छन् । अध्यक्ष तामाङले तिब्बत र भुटानमा रहेका यस्तै संरचनापछि नेपालमा सुनापतिमा १०८ छोर्तेन रहेको उल्लेख गर्दै यसको ऐतिहासिक तथा धार्मिक महत्त्व उजागर गर्न खोजिएको बताउनुभयो । उहाँका अनुसार पुराना छोर्तेनको इतिहास, निर्माणकाल र पृष्ठभूमिबारे अध्ययन गर्न समिति गठन गरी खोज तथा अनुसन्धानको काम अघि बढाइएको छ । पुराना संरचनाको मौलिकता जोगाउँदै नयाँ १०८ छोर्तेनसमेत निर्माण गरिएको उहाँले जानकारी दिनुभयो । बौद्ध परम्परामा छोर्तेनको विशेष धार्मिक महत्त्व रहेको उल्लेख गर्दै अध्यक्ष तामाङले यस क्षेत्रमा विभिन्न प्रकारका छोर्तेन रहेको बताउनुभयो । उहाँका अनुसार छोर्तेनमा धार्मिक विधिअनुसार पवित्र वस्तु तथा सामग्री राख्ने परम्परा छ । सुनापतिमा बौद्ध धर्मावलम्बीका लागि १०८ छोर्तेन र हिन्दू धर्मावलम्बीका लागि महादेवस्थान तथा शिवको मूर्ति रहेका कारण यस क्षेत्रलाई बहुधार्मिक आस्थाको साझा गन्तव्यका रूपमा विकास गर्न सकिने गाउँपालिकाको विश्वास छ । धार्मिक सहिष्णुता र सांस्कृतिक विविधतालाई पर्यटन विकाससँग जोड्नु सुनापतिको विशेषता भएको अध्यक्ष तामाङको भनाइ छ ।
गाउँपालिकाले शिवको मूर्ति निर्माणका लागि ४० लाख रुपैयाँ विनियोजन गरेको र अन्य खर्चसमेत जोड्दा करिब ६० देखि ७० लाख रुपैयाँ खर्च भएको अध्यक्ष तामाङले जानकारी दिनुभयो । उहाँका अनुसार यस क्षेत्रमा सेतो मच्छिन्द्रनाथ र बुद्धको मूर्ति निर्माण तथा अन्य धार्मिक सम्पदाको विकाससमेत अघि बढाइएको छ । सुनापतिको भौगोलिक अवस्थिति, हिमाल र शैलुङ क्षेत्रको दृश्य, महाभारत पर्वत शृङ्खला तथा सुनकोशी नदीको दृश्यावलोकन गर्न सकिने भएकाले यस क्षेत्रलाई पर्यटनका दृष्टिले महत्त्वपूर्ण मानिएको उहाँले बताउनुभयो । 
गाउँपालिकाले सन् २०२६ सँग मेल खाने गरी वि.सं. २०८३ लाई पर्यटन वर्षका रूपमा अघि बढाउने र सुनापति महोत्सव आयोजना गर्ने योजना बनाएको अध्यक्ष तामाङले बताउनुभयो । उहाँका अनुसार मंसिर २५ गते महोत्सव उद्घाटन गर्ने, २६ गते बालमैत्री घोषणा गर्ने तथा २७ गते ११औँ अवतारी लामा रिम्पोछेको उपस्थितिमा १०८ छोर्तेनको उद्घाटन र पूजासम्बन्धी कार्यक्रम गर्ने तयारी गरिएको छ । सोही अवसरमा शिवस्थानमा पनि धार्मिक अनुष्ठान आयोजना गर्ने योजना छ । महोत्सवमा सुनापतिमा बसोबास गर्ने विभिन्न जातजातिका मौलिक संस्कृति, परम्परागत बाजागाजा, नृत्य तथा सांस्कृतिक पहिचान प्रदर्शन गरिनेछ । तामाङ, माझी, मगर, नेवारलगायत समुदायका संस्कृति प्रस्तुत गर्ने तथा स्थानीय उत्पादनको प्रदर्शनी र बिक्री गर्ने योजना रहेको अध्यक्ष तामाङले बताउनुभयो । महोत्सवमा स्थानीय कोदो तथा फापरका परिकार, सिस्नु, सुन्तला, किबी, टिमुरको अचार, मह, गलैँचा, थाङ्का, बुद्धचित्तको माला, मकै, भटमास र गुन्द्रुकलगायत उत्पादनलाई प्राथमिकताका साथ प्रदर्शन गरिनेछ । गाउँपालिकामा हाल सामान्य दिनमा दैनिक ५० देखि ६० जना र शनिबार तथा आइतबार एक सयदेखि डेढ सय जनासम्म पर्यटक आउने गरेको अध्यक्ष तामाङले बताउनुभयो । आगामी दिनमा दैनिक दुईदेखि तीन सय पर्यटक भित्र्याउने लक्ष्यसहित पर्यटन पूर्वाधार र प्रचारप्रसारलाई व्यवस्थित बनाउने योजना रहेको उहाँले उल्लेख गर्नुभयो । यी पर्यटक सङ्ख्या गाउँपालिका अध्यक्षले उपलब्ध गराउनुभएको विवरणमा आधारित छन् ।
सुनापति गाउँपालिकाले स्थानीय कृषि उत्पादन र परम्परागत सीपलाई आर्थिक गतिविधिसँग जोड्ने योजना पनि अघि सारेको छ । स्थानीय उत्पादनको बजारीकरण, प्रशोधन र ब्रान्डिङमार्फत कृषकको आयआर्जन बढाउने उद्देश्य रहेको अध्यक्ष तामाङले बताउनुभयो । स्थानीय मदिरालाई व्यवस्थित रूपमा उत्पादन, लेबलिङ र ब्रान्डिङ गर्ने सम्बन्धमा गाउँपालिकाले कार्यविधि बनाएको उहाँले जानकारी दिनुभयो । यद्यपि, स्थानीय उत्पादनलाई आधिकारिक रूपमा व्यावसायिक बजारमा पु¥याउन आवश्यक कानुनी अधिकार र प्रक्रियाको विषय अझै चुनौतीपूर्ण रहेको उहाँको भनाइ छ । स्थानीय मकै, कोदो र फलफूलबाट उत्पादन हुने परिकार तथा पेय पदार्थलाई व्यवस्थित उत्पादन प्रणालीमा जोड्ने सोच रहेको अध्यक्ष तामाङले बताउनुभयो । तर, स्थानीय मदिराको गुणस्तर, खाद्य सुरक्षा र प्रचलित कानुनी व्यवस्थाको पालना सुनिश्चित गर्नु पनि आवश्यक हुनेछ । गाउँपालिकाले स्थानीय खाद्य पदार्थको उपभोग प्रवद्र्धन गर्दै पोषण र स्वास्थ्यसम्बन्धी जनचेतना बढाउने लक्ष्यसमेत राखेको छ । बजारमा पाइने अत्यधिक प्रशोधित खाद्य पदार्थको निर्भरता घटाउन स्थानीय उत्पादनलाई विकल्पका रूपमा अघि बढाउने योजना रहेको अध्यक्ष तामाङले बताउनुभयो । 
शिक्षा क्षेत्रको विकासका सन्दर्भमा अध्यक्ष तामाङले डढुवा माध्यमिक विद्यालयलाई उदाहरणका रूपमा प्रस्तुत गर्नुभयो । विद्यार्थी सङ्ख्या बढ्दै जाँदा विद्यालयको व्यवस्थापन, अनुशासन र शिक्षण गुणस्तर कायम राख्नु चुनौतीपूर्ण भए पनि विद्यालयमा जिम्मेवार शिक्षक तथा व्यवस्थापन टोली रहेको उहाँको भनाइ छ । उहाँका अनुसार डहुँ माविमा ५ देखि ६ सयसम्म विद्यार्थी व्यवस्थापन गर्नुपर्ने अवस्था रहेकाले विद्यालयको शैक्षिक गुणस्तर र स्रोतसाधनको व्यवस्थापनमा गाउँपालिकाले चासो राख्दै आएको छ । 
सुनापति गाउँपालिकामा पहिरोको जोखिममा रहेका बस्ती स्थानान्तरण गर्ने काम भने प्राविधिक अध्ययन र सम्बन्धित निकायको प्रक्रियाका कारण अघि बढ्न नसकेको अध्यक्ष तामाङले बताउनुभयो । हालैको वर्षाका कारण जोखिम बढेपछि आफू चिन्तित बनेको उल्लेख गर्दै उहाँले तत्कालका लागि प्रभावित परिवारलाई सुरक्षित स्थानमा बस्न त्रिपाललगायत अस्थायी सामग्री उपलब्ध गराइएको जानकारी दिनुभयो । तर, दीर्घकालीन समाधानका लागि सुरक्षित स्थानमा बस्ती स्थानान्तरण आवश्यक रहेको उहाँको भनाइ छ । अध्यक्ष तामाङका अनुसार गाउँपालिकाले सम्भावित स्थानहरूको पहिचान गरी सम्बन्धित निकायमा विवरण र कागजात पठाइसकेको छ । भूगर्भविद्को टोलीले जोखिमयुक्त क्षेत्र र स्थानान्तरणका लागि प्रस्तावित स्थानको प्राविधिक अध्ययन गर्नुपर्ने भए पनि उक्त प्रक्रिया अझै पूरा भएको छैन । स्थानान्तरणका लागि घर तथा जग्गा नभएका परिवारलाई आवश्यक सहयोग उपलब्ध गराउने सम्बन्धमा विवरण सङ्कलन गरी पठाइएको उहाँले बताउनुभयो । भूगर्भविद्को टोलीबाट थप अध्ययन र आवश्यक सिफारिस प्राप्त भएपछि प्रक्रिया अघि बढ्ने अपेक्षा गरिएको छ । बस्ती स्थानान्तरणको विषयमा गाउँपालिकाले आफ्नो तर्फबाट गर्नुपर्ने काम पूरा गरेको दाबी गर्दै अध्यक्ष तामाङले सम्बन्धित प्राविधिक तथा सरकारी निकायबाट समयमै आवश्यक प्रक्रिया पूरा हुनुपर्नेमा जोड दिनुभयो ।
 

एनसीसी तालिममा रामेछापका विद्यालयको उत्कृष्ट नतिजा, पटनादेवी बन्यो प्रथम

२८ असोज २०८३, बुधबार रामेछाप- नेपाली सेनाद्वारा सञ्चालित राष्ट्रिय सेवा दल (एनसीसी) को सि.सं. ५२ जुनियर डिभिजन क्याडेट तालिमअन्तर्गत आयोजित वार्षिक

खिम्ती ग्रामीण विद्युत सहकारीद्वारा ई–सेवा मार्फत महसुल भुक्तानी सुरु

२८ असोज २०८२, बुधबार रामेछाप-  खिम्ती ग्रामीण विद्युत तथा सहकारी संस्थाले विद्युत महसुल भुक्तानी प्रक्रियालाई सहज, सरल र प्रविधिमैत्री बनाउने

प्रेस चौतारी रामेछापको शुभकामना आदानप्रदान : एकता, सद्भाव र प्रेस स्वतन्त्रतामा जोड

२७ असोज २०८३, मंगलवार रामेछाप- प्रेस चौतारी नेपाल रामेछापले विजयादशमी, शुभ दीपावली, नेपाल संवत् तथा छठ पर्व २०८३ को अवसरमा शुभकामना आदानप्रदान